Қазақстан мұсылмандары діни басқармасының Атырау облысы бойынша өкілі, орталық "Иманғали" мешітінің Бас имамы Батыржан Мансұров Атырау қалалық "Caspian news" телеарнасына сұхбат берді.

Телеарнаның "Имам уақыты" бағдарламасына көрермендерден келіп түскен сауалдарға жауап берген ұстаз Батыржан Берденұлы мешітке кіру тәртібі, исламның құндылықтары, жат ағымнан сақтану жолдары хақында әңгімеледі.

"Мәселен, жер бетіндегі ең қасиетті орын - бұл Алланың үйі. Себебі, Алланың үйінде отырып жасалған дұға қабыл болады. Алайда, мешітке келудің өзіндік тәртібін сақтаған абзал. Ең алдымен, мұсылман баласы мешітке дәретпен келуі міндет. Мешітке кірерде дұға жасап, табалдырықтан оң аяғымен аттап, шығарда сол аяғымен шығуы қажет. Құлшылық жасаушы өзгеге кедергі жасамайтындай етіп, әдеп сақтағаны абзал. Дәретпен келіп, дұғада болған адамға сол мұсылман үшін дұға ету үшін екі періште тағайындалады. Ең бастысы, кіршіксіз ниет болуы қажет",- деп атап өтті ұстаз Батыржан Берденұлы.