Қоғамда күнделікті жиі қолданылып отыратын дана сөздерінің бірі: «Кең болсаң – кем болмайсың» деудің  мәніне үңілсеңіз адам бойындағы жомарттық, қайырымдылық қасиеттерді меңзеп отырғанын білесіз. Асыл дініміздің өзі адам баласын мейірімді, қайырымды болуға үндейді.

Бүгін Жамбыл облысы бойынша «Зекет» корпоративтік қор өкілдігінің қолдауымен және облыстық «Һибатулла Тарази» мешітінің ұйымдастыруымен «Рамазан шарапаты» атты 1000 отбасына арналған қайырымдылық шарасы өтті.

Жалпы, Жамбыл облысы бойынша өткізіледі деп жоспарланған 1000 отбасына арналған бұл қайырымдылық шарасы бүгін Тараз қаласынан бастау алып отыр. Осыған орай, орталық «Һибатулла Тарази» мешітінде 350 отбасына арналған азық-түлік сөмкесі таратылды.  Жалпы, осы шарада көмек алған әр 350 отбасына 10 000 теңгеден ақша жұмсалса, 1000 отбасына 10 миллион теңге қаражат жұмсалмақ.

Ал, қалған 650 отбасына облысымыздың өзге де аудан, ауылдарында қайырымдылық көмек берілетін болады.

Іс-шара барысында орталық «Һибатулла Тарази» мешітінің бас имамы Данияр Әлимұхамедұлы көмек алушы әр отбасына Алладан амандық пен береке тілеп, шара соңында облыстық «Jambyl» телеарнасына осы іс-шара туралы сұхбат берді.

Алла үйінде қуанышқа кенелген мұқтаж жандар осы игі шараны ұйымдастырған «Һибатулла Тарази» мешіті мен «Зекет» корпоративтік қор өкілдігіне шексіз алғыстарын айтып тарасты.

Екі мекеме осы уақытқа дейін де бірлесе отырып бірнеше қайырымдылық шараларды өткізген болатын. Бүгінгі іс-шара да соның бір жалғасы болды. Алланың қалауымен, алдағы уақытта да бұл игі іс жалғасатын болады.