«National art» жастар қоғамдық бірлестігінің ұсынысымен облыстық мәдениет, архивтер және құжаттама басқармасының қолдауымен жүзеге асқан кездесу барысында қазіргі қоғамдағы танымал азаматтардың бірі, аралас жекпе-жектен үш дүркін Әлем чемпионы, Еуразияның екі дүркін чемпионы, Әлем Кубогының иегері Ардақ Назаров павлодарлықтармен қауышып, тәрбиелік мәні зор әңгілемелерін айтты.

С. Торайғыров атындағы облыстық кітапханаға келген мейманды мәдениет, архивтер және құжаттама басқармасының басшысы Ардақ Райымбеков қарсы алды.

Дөңгелек үстел барысында белгілі спортшы 2002 жылы Павлодар қаласына жарысқа келіп, Еуразия чемпионы атанған сәттерін есіне алды. Бұдан соң мейман бес жасар Иманғали есімді балаға батасын беріп, асық ойынын ойнады.

Өз кезегінде облыстық мәдениет, архивтер және құжаттама басқармасының басшысы Ардақ Райымбеков павлодарлықтардың атынан Ардақ Назаровқа Мәшһүр Жүсіптің 20 томдығын сыйға тартты.

Бұдан кейін Ардақ Назаров және Әлем чемпионы Аңсар Дәулетбаев «Шаңырақ» орталығында павлодарлықтармен жүздесті. «Рухани жаңғыру» бағдарламасы аясында жүзеге асқан шараға 600-ден астам адам жиналды.

Айта кетейік, Әлем чемпионы Әмір мен Нұрасыл есімді ұлдардың тұсауын кесті. Осыдан соң Ардақ Назаров «Абылай» спорт клубына барып, жас спортшыларға шеберлік сағатын өткізіп, ақыл-кеңестерін берді.

Павлодар облысының аралас жекпе-жек (ММА), панкратион және грэпплинг федерациясының президенті Алтынбек Рысжанов Ардақ Назаровқа күміс қылыш тарту етті.

Сондай-ақ, Ардақ Назаров С. Торайғыров атындағы Павлодар мемлекеттік университетінің студенттерімен де кездесу өткізіп, салмақты да салиқалы әңгілемерімен бөлісті.