«Өзгеруді өзіңнен баста!»: ҚМДБ-ның облыстағы өкілі Болатбек Ұласқанұлы Қазақ гуманитарлық заң және техникалық колледжінің студенттерімен өткен кездесуінде жастарға осылай үндеу тастады.

ҚМДБ-ның Қызылорда облысы бойынша өкілдігі, «Жастар ісі» секторының ұйымдастыруымен еркін пікір алмасу форматында өткізілген кездесуде «адам өзгеруі үшін не істеуі керек», «айналасындағылармен көркем мәміледе болу», «дінді дұрыс ұстану», «ата-ананың разылығына жету», «бос уақытты тиімді пайдалану жолдары» секілді тәрбиелік мәні бар мазмұнды тақырыптар төңірегінде өкіл имам тарапынан өнегелі өсиеттер, ғибратты әңгімелер, өмірлік мысалдар келтіріліп, сұрақтарға тұщымды жауап берілді.

Елбасымыз атап өткендей, рухани құндылықтарымызды қайта жаңғырту арқылы болашақ ұрпаққа сапалы тәрбие беру мақсатындағы игі шараның ұйымдастырылуына мұрындық болған өкіл имамға колледж директоры Марат Шайхысламұлы қоғамның негізгі күші – жастарымызды тәрбиелеуде жасап жатқан бастамалары үшін алғыс білдіріп, қызметіне сәттілік тіледі.