Ақмола облысындағы барлық мешіттерде Наурыз мерекесі аталып өтілді. Аудан, ауыл мешіттері бұл күні жамағатқа наурыз көжеден дәм татқызды. Ал, Көкшетаудағы «Науан Хазірет» мешітінде көктем мерекесі екі күн қатарынан тойланды. 22-ші және 23-ші наурыз күндері құран оқытуға келген халықпен, бесін және жұма намазына келген намазхандар мерекелік астан ауыз тиді.

Сондай-ақ, ақсақалдарға да мерекелік дастархан жайылып, мешіт ұжымы үлкендердің ақ батасын алды

22 наурыз күні неке қидырған жас жұбайларға айырықша сый тарту етілді. Бұл күні мешіт ұжымы жаңадан шаңырақ көтеріп отырған 7 отбасыға қабырға сағаттарын сыйға тартты. Оның өз себебі бар. Өйткені, әр адам уақыттың қадірін білуі тиіс. Сыйлықта әр жұптың аты-жөні жазылған. Жұптардың некесін қиған имамдар, жастарға неке жайлы уағыз айтып, уақыттың қадірі туралы Пайғамбарымыздың (оған Алланың игілігі мен сәлемі болсын) хадистерінен насихат айтты.