«Нұр Ғасыр» облыстық орталық мешітінің қызметкерлері Аналар үйінде болып, жас аналарды Наурыз мерекесімен құттықтап қайтты.

Мешіт ұстазы Кенжегүл Қошқарова мешіттің «Сен де үлес қос!» қайырымдылық акциясының атынан 18 кг азық-түлік пен арнайы балаларға әкелінген киімдерді табыстады. Соның ішінде, 2 комбинезон, жөргектер, т.б. 10 кг киім-кешек берілді.

Меймандарға мерекелік дастархан жайып, ілтипат көрсеткен Аналар үйінің меңгерушісі Лакова Таңсұлу баршасына наурыз көжеден дәм таттырды. Аналар үйін назардан тыс қалдырмай, көмек-қолдау көрсетіп отыратын өкіл имам бастаған мешіт ұжымына ерекше алғысын білдіріп, рахметін айтты. Дәм басында жақсы тілектер жолданып, жуырда ғана дүние есігін ашқан сәбилерге есен-саулық тіленіп, олардың кемел келешектері үшін дұға етілді. Мешіттің наиб имамы Нұрбол Смағұлов бес сәбидің құлағына азан шақырып, балалардың есімдері қойылды.