Бүгін Орал облыстық орталық мешітінде ҚМДБ-ның БҚО бойынша әйелдер-қыздар секторының ұйымдастыруымен «Білімді дамытпаған елдің болашағы жоқ» тақырыбында екі күндік семинар өтті. Семинарға Орал орталық мешітінің ұстаздары, апаларымыз бен ару қыздарымыз қатысты.

Семинар басында ҚМДБ-ның БҚО бойынша әйелдер-қыздар секторының төрайымы, облыстық орталық мешітінің ұстазы Гүлжамила Ахметова сөз алып, ақ тілегін айтып, семинар жұмысына сәттілік тіледі. Бірінші күні мешіт ұстазы Бақытгүл Өтегенқызы «Қыз- келіншектерге қатысты фиқһ мәселелері» атты тақырып аясында насихат жасаса, екінші күні «Отбасы құндылығын сақтау – мемлекеттің даму кепілі» жайында сөз қозғап, апаларымыз бен аруларымызға фиқһ тұрғысынан білімді болуға, құлшылықтарын кемел атқаруға шақырды. Құлшылықта мән берілмейтін кейбір қателіктерді айтып, ара-жігін ажыратып, отбасылық құндылықтарын кеңінен түсіндірді.

Шара соңында сұрақтар қойылып, жауап берген шәкірттерге сыйлықтар беріліп, сертификаттар табысталды.

Осындай игі бастамалар жыл соңына дейін жалғасын тауып, аудан көлемінде жалғаспақ.