Жақында Қазақстан мұсылмандары діни басқармасының Қостанай облысындағы өкілдігіне қарайтын әйелдер және қыздар секторының ұйымдастыруымен Пайғамбарымыз Мұхаммедтің (ол кісіге Алланың игілігі мен сәлемі болсын) туған күні, яғни Мәуліт мерекесіне орай тағылымды шара болып өтті. Оны облыстық мешіттің ұстаздары Дайыр Рыскүл мен Қаңлыбаева Гүлдана және шәкірттер өздеріне тән шеберлікпен өткізді. Жиналған қауымның алдында облыстық мешіттің наиб имамы Сейіт Нұрқанов сөз сөйлеп, Мәуліт мерекесінің өзіндік ерекшелігі мен мән-мағынасы жайлы баяндады.

Сонымен қатар жиында мешіттің шәкірттері Ақгүл апа мен Айдана және Жанаттар қасиетті Құранды оқығанда, келген көпшілік ұйып тыңдап, көп жайды көңілдеріне тоқыды.

Баршаға мәлім, игі шараларда Мәуліт қиссасы және Пайғамбарымызға салауат айтылады. Оны мешіттің шәкірттері орындады. Сондай-ақ, көпшілікке Қостанай мемлекеттік педагогикалық институтының студенттері орындайтын «Адамзаттың асыл тәжі» деп аталатын сахналық көрініс ұсынылды.

Болашағынан үлкен үміт күттіретін 4 сынып оқушысы, мешіттің қабілетті шәркірті Ділназ Наурыз «Мәуліт күні» деген жыр шумағын мәнерлеп оқып берді.

Кеш барысында қатысушыларға викториналық сауалдар қойылып, сыйлықтар берілді.