Әрбір жоғары оқу орнында университетке жаңа қабылданған шәкірттерді студент қатарына қосылуымен салтанатты түрде құттықтап жатады. Осы дәстүр Халықаралық студенттер күніне орай биыл Нұр-Мүбарак университетінде ерекше аталып өтті. Нақтырақ айтқанда биыл оқуға түскен 400-дей студенттің 88-і  нәзік жандар. Оларға арнап университеттегі қыз-келіншектерге арналған «Қыз Жібек» клубы «Арнау» кешін ұйымдастырды.

Бауырмалдық, ізгілік туралы өлеңдер оқылды. Жоғары курстың өнерлі өрендері күмбірлетіп күй шертіп, мың бұралған би билеп, әуелетіп ән айтты. Интеллектуалды ойындар ұйымдастырылып, оған шәкірттермен бірге ұстаздар да қатысты. PhD докторы, психолог Әлия Төлегенова ханым ақ босаға аттаған ибалы келіннің міндеті жайлы шағын тренинг ұйымдастырды.

Алматыдай алып шаһарға ауыл-аймақтан имене келіп, университеттің табалдырығын аттаған студент қыз-келіншектер де өздерін құшақ жая қарсы алып, бауырға басып, қолдарына білімнің алтын кілті мен студенттік билет ұстатқан ұйымдастырушыларға шексіз алғыстарын жаудырды. Жас студенттерге кішігірім сый-сяпаттар жасалып барлығы өзара тығыз араласып кетті.