Өткен аптада облыстық дін істері басқармасы, қалалық ішкі саясат бөлімі және «Жарық» ақпараттық-консультативтік орталығының ұйымдастыруымен өңірге Республикалық ақпараттық-түсіндіру тобының мүшелері арнайы іссапармен келіп, зайырлылық қағидаттары мен діни тұрақтылықты қамтамасыз ету мәселелері бойынша түсіндіру жұмыстарын жүргізді.

ҚР Дін істері және азаматтық қоғам министрлігі және ҚМДБ жолдауымен келген теологтар Ақтөбе қаласы және Мұғалжар, Темір аудандарының тұрғындарымен кездесті. Атап айтқанда, ҚР Дін істері және азаматтық қоғам министрлігі Дін істері комитетінің дінтану сараптамасы басқармасының басшысы Балғабек Мырзаев, Л.Гумилев атындағы Еуразия ұлттық университеті Әлеуметтік ғылымдар факультеті «Дінтану» кафедрасының меңгерушісі Кеңшілік Тышхан және ҚМДБ насихат және қоғаммен байланыс бөлімінің меңгерушісі Алтынбек Ұтысханұлы.

Қалалық №40 орта мектебі мен медициналық колледж шәкірттері, ұстаздары, мектептің дінтану пәні мұғалімдерінің қатысуымен өткен шараларда тұрғындардың толеранттылық санасын қалыптастыру, діни сауаттылықты көтеру, діни экстремизм және терроризм көріністерінің алдын алу және мектеп формасына қатысты мәселелер қозғалды. Сондай-ақ, жаң зан жобасына енгізілетін толықтырулар мен өзгерістер жайлы айтылды. Мамандар қатысушылардың сауалдарына жауап беріп, кез-келген түйткілде ортақ бітім, келісімге келе білудің маңызды екендігін ескертті. Дәл осындай мазмұндағы шара Темір аудандық Мәдениет үйінде де өтті.

Дін мамандары облыстық орталық «Нұр Ғасыр» мешіті және қалалық орталық мешіт, Мұғалжар, Темір аудандық мешіттерінде де жамағатпен кездесіп, түсіндіру жұмыстарын жүргізді. Дінді келте түсінудің кесірі мен орта жолды ұстану, тұрақтылық пен келісім сақтаудың маңыздылығы айтылды. Кездесулерде шамамен 3600-ден астам адам қамтылды.