Бүгін – Рухани келісім күні. Атаулы күннің құрметіне облыстық орталық «Нұр Ғасыр» мешіті әр түрлі ұлт өкілдерін мейман етіп, дастархан жайды. Оның ішінде, қазақ, украин, орыс, т.б. ұлт өкілдері болды.

Мешіт қызметкері Мәжит Әбішев пен ұстаз Кенжегүл Қошқарова көпұлттылық – мемлекетіміздің басты құндылығы, бірлігі – байлығы екендігін айтып, ұлттар мен ұлыстардың достығы ислам ұстанымына сәйкес келетіндігін тілге тиек етті. Бір үйдің баласындай бір дастархан басында дәм ауыз тиген меймандар да жылы лебіздерін жеткізіп, қазақтың қонажайлылығын сөз етті. Қуандық ақсақал елдігіміз бен ауызбіршілігіміздің мәңгі болуын тілеп, дұға жасады.

Мешіттің «Сен де үлес қос!» акциясы аясында барлық меймандарға кәдесый есебінде азық-түліктер салынған әлеуметтік пакеттер үлестірілді. 22 адамға барлығы 44 кг ұн, 22 кг макарон, 22 кг қант, 22 кг күріш, 66 кг ет және 15 дана қызанақ пасталары, барлығы 176 кг азық-түлік берілді.