Бүгін «Ақтөбе медресесі» колледжінде өткен ауыл молдалары мен молдалыққа үміткер жандарға арналған бір айлық білімді жетілдіру курсының жұмысы қорытындыланды. Өкіл имам Төлеби Оспан және медресе директоры Әбдімүтәлі Дәуренбеков аталмыш курсқа толық қатысқандарға арнайы Сертификаттар табыстап, білімдеріне Алла берекет берсін деген ізгі тілектерін арнады. Аталмыш құжат қатысушының курс бағдарламасын меңгергендігін растау үшін берілді.

Бір айға жалғасқан курсқа 15-ке жуық адам қатысты. Оларға Ақида, Фиқһ Құран, Тәжуид пәндерінен дәріс жүргізілді. Сондай-ақ, діни рәсімдерге қажетті дұғалар мен құтпалар жаттатылды. Курсты жүргізген медресе ұстаздарына алғыс айтқан өкіл имам Төлеби Дәділұлы олардың еңбектеріне жеміс тілеп, өз ризашылығын жеткізді.

Игі үрдіске айналған бастаманың бұл бірінші мәрте ұйымдастырылуы емес. Қатысушылар тарапынан қолдау тауып отырған игі шара білімді жетілдіру – бүгінгі заман талабы екендігін тағы да бір қуаттай түседі.