Мұхаррам айы
Мұхаррам айының ең мәнді күні, Мұхаррам айының 10-шы жұлдызы (30.09.2017) - Ашура Күні. Ибн Аббас (оған Алла разы болсын) былай айтқан: «Пайғамбарымыз (оған Алланың салауаты мен сәлемі болсын) Мединеге келіп, яһудилердің Ашура күні ораза ұстап жүргенін көріп: «Бұл не?» - деп сұрайды. Олар былай жауап береді: «Бұл — қайырлы күн, осы күні Алла Ысраил ұлдарын жаулардан құтқарған, сондықтан Мұса осы күні ораза ұстайтын болған». Бұған Пайғамбарымыз (оған Алланың салауаты мен сәлемі болсын): «Сендерге қарағанда, менің Мұсада көбірек құқым бар!» - деп жауап беріп, осы күні өзі де ораза ұстап, басқаларға да ораза ұстауға бұйырған екен». Айша анамыз былай айтқан: «Жәһилиәт заманында құрайыштар Ашура күні ораза ұстаған әрі Алла Елшісі де (оған Алланың салауаты мен сәлемі болсын) ораза тұтқан. Ол Мединеге келген соң да ораза ұстауын тоқтатпаған, басқаларға да ораза ұстауға бұйырған. Рамазан айында ораза ұстау парыз етілген күннен бастап, ол Ашура күні ораза ұстауын доғарған екен. Сол кезден бастап Ашура күні ораза ұстағысы келгендер – ұстап, ұстағылары келмегендер - ұстамаған».
Ашура Күні ораза ұстау Алла Елшісінің (оған Алланың салауаты мен сәлемі болсын) сүннеті болып табылады. Ибн Аббас (оған Алла разы болсын) былай айтқан: «Мен Алла Елшісін (оған Алланың салауаты мен сәлемі болсын) Ашура күні мен Рамазан айынан басқа уақытта ораза ұстауға сондай құштар болғанын ешқашан көрмеп едім» (әл-Бұхари).
Ең дұрысы оразаны Мұхаррам айының 9-шы және 10-шы немесе 10-шы және 11-ші күндері ұстаған жөн.
Пікірлер (1)
Тіркелген қолданушылар ғана пікір қалдыра алады. Сайтқа кіру
Әбілқайыр Болатбаев | 23.09.2017 02:45
Ассалаумағалейкүм, құрметті бауырлар.
Осы мақалада қате жіберілген сияқты. Мына фрагментті қарап көріңіздерші:
"«Мен Алла Елшісін (оған Алланың салауаты мен сәлемі болсын) Ашура күні мен Рамазан айында ораза ұстауға сондай құштар болғанын ешқашан көрмеп едім (әл-Бұхари)."
Бәлкім, бұл жерде Алла Елшісінің (оған Алланың салауаты мен сәлемі болсын) Ашура күні мен Рамазан айынан басқа уақытта ораза ұстауға сондай құштар болғанын ешқашан көрмегені туралы айтылып тұрған болар.
Алла разы болсын!
Құрметпен,
Әбілқайыр