ЖАУАП: – Аса қамқор ерекше мейірімді Алланың атымен бастаймын! Құран – адамзатты надандықтан, зұлымдықтан тура жолға, ілім мен өркениет жолына бастайтын Хақ кітап. Қасиетті кітабымыз өмірдің барлық саласын қамтыған, адамның адамдға тән өмір сүруін үйрететін Алланың кемшіліксіз кемел сөзі. Құран – ешқашан ғасыр соңында қалмайтын, керісінше ғасырды, заманды өз соңына жетелейтін Жаратушының ұлы сөзі. Оның көркемдігінде шек жоқ. Бүгінгі күнге дейін, осы сағатқа дейін ұлық кітаптардың ішінде өзгеріске ұшырамаған тек Құран ғана. Құран оқылған, оған амал етілген үйде, жерде, елде тыныштық орнайды, Алланың берекеті болады. Бұдан түйетін ой – Құрансыз өмірдің мәні де сәні де жоқ. Пайғамбарымыздың (с.ғ.с.) хадисінде: «Үйлеріңізде Құран Кәрімді көп оқыңыздар. Себебі Құран оқылмаған үйде жақсылық, береке аз болады. Ондай үй-іші әрдайым қиыншылықта болады. Яғни, ондай үйде тыныштық болмайды», – деген. Расында да, қазіргі әлемдегі, өзіміз өмір сүріп отырған қоғамдағы арсыздықтар, шаңырақтың шайқалуы, ұрыс-жанжалдардың өршіп кетуі, жамандық атаулының бәрі Құраннан алшақтаудың, Алланың сөзіне бойсұнбаудан туған қасіретті жағдайлар. Алла одан сақтасын! Қарайған жүректерге нұр беруші – Құранға ден қойған адам ондай күнәлі істерге әсте жол бермейді. Адамды тек жақсылыққа бастайтын Құран аяттарын жұртымыздың жүрегіне ұялату, жастарымызды жақсылыққа шақыру, қариларымыздың қатарын көбейту мақсатында ҚМДБ төрағасы, Бас мүфти Ержан қажы Малғажыұлының бастамасымен осы шараны ұйымдастырдық. Әрине, бұл ұжымдық шара болғандықтан, Діни басқарманың барлық қызметкерлері, Алматы Орталық мешітінің және қала мешіттерінің имамдары да атсалысты. Оларға Алла разы болсын.

ЖАУАП: Бас-аяғы өңірлік іріктеу турларында 600-ге жуық жас қарилар сынға түсті. Оған дейін аймақтарда іріктеу турлары да ұйымдастырылды. Өңірлік іріктеу турларының өзі екі кезең бойынша өтті. Бірінші кезеңде үміткерлер аудан орталықтарында іріктеліп облысқа шықса, екінші кезеңде облыстық байқауда жүлделі орындарға ие болғандар Республикалық шараға жолдама алды. Құран жаттаған қариларымызға төрт бағыт бойынша талап қойылды. Олар – Құранды мәнерлеп оқу, 5 және 10 параны жатқа оқу, сонымен қатар Құранды толық жатқа оқу. Осы төрт талап негізінде шәкірттер бақ сынасты.

ЖАУАП: Иә, билет тегін болды. Өйткені, бұл кеште рухани көріністер мен терме-толғаулар орындалды. Халқымыз ғибратты кештен әсер алып, олардың иманы арта түссін деген ниет болды. Мысалы, сол кездегі көріністен көпшілік көздеріне жас алды. Құраннан алшақтаған адам арсыздыққа бой алдыратынына көздері жетті. Бас мүфти Ержан қажы Малғажыұлы бүгінді таңда имам-молдаларды дін мен дәстүрімізді сабақтастыра отырып, халыққа Исламның асыл құндылықтарын насихаттауға үндеп келеді. Рухани кешіміз де ұлттық нақышпен өтті. Арасында күй тартыс та орындалды. Тәуелсіздік заманында осындай нығметке қол жеткізіп отырмыз. Аллаға шүкір дейміз.

ЖАУАП: Аллаға шүкір, халқымыз имандылыққа бет бұрып, парыз амалдарын орындауға ықылас танытып келеді. Сауапты шараларға үлес қосам деген қалталы, иманды азаматтарымыз да көбеюде. Қорытынды рухани кешті жүргізген танымал актер Ерлан Біләл бауырымыз халық алдында ақшалай марапаттаулар мешіт садақасынан емес, дініміздің жанашыр азаматтарының, кәсіпкер бауырларымыздың берген қаражаты есебінен жұмсалып жатқанын ашық жариялады. Осы сәтті пайдаланып, ол азаматтарға да Алла разы болсын айтамыз.

ЖАУАП: Қазылар алқасында наиб мүфти, «Әзірет Сұлтан» мешітінің бас имамы Серікбай қажы Ораз, Алматы қалалық орталық мешітінің наиб имамы Жұманазар қари Садырханов, «Нұр» Египет-қазақ ислам университетінің оқытушысы Йасир қари, Жамбыл обылысының өкіл имамы Данияр қари Жұмабаев, Астана қарилар медресесінің директоры Садуақас қари Олжабаев және мен болдым. Құранның 30 парасын, яғни толық жаттағандардың арасынан 4 қариымыз ақтық сында бақтарын сынады. Сөйтіп, еліміздің әйгілі қариларынан құралған әділқазы алқасы Құранның 6 236 аятаның кез келгенін оқыды, сол мезетте үміткерлер мүдірместен жалғап әкетті.

Олардың аяттарды оқыған кезде тәжиуд қағидаларын сақтап, қаріптердің махраждарын дұрыс шығарып, қырағат жолдарын бір-бірімен шатыстырмай, әділқазы тоқтатқанша әдемі әуенмен оқуларына аса мән берілді. Сарайға жиналған жамағаттың және қазылардың бірауыздан келіскен шешіміне сай, 15 жастағы Яхия Құрбан бауырымыз бас жүлдеге лайық деп табылды. Мінекей, қариларымыздың қатары көбейіп келеді. Осының бәрі Алланың қалауымен тәуелсіздігіміздің арқасында жүзеге асып жатыр. Құранды жаттау тақуалық жолға жетелейді. Тақуалық аласапыран алдамшы мына өмірде талай тығырыққа тірелген пендені қиыншылықтан алып шығып, өзі күтпеген жетістіктерге жеткізеді. Бұл жөнінде Қасиетті Құрандағы «ат-Талақ» сүресінің 2-3 аяттарында: «Алланың қаһарынан қорқатын жандарға Жаратқан, қиындықтан шығатын жол көрсетеді. Ойламаған жерден Алла оны ризыққа кенелтеді. Тәңірге тәуекел етіп, құлшылықпен жүрген жан үшін Жаратқанның қамқорлығы жетіп артылады», - деген.

Қорытынды рухани кешімізді тамашалағысы келген оқырмандар ҚМДБ-ның www.muftiyat.kz ресми сайтындағы бейне жазбадан көре алады.

ЖАУАП: Қазақстан мұсылмандары діни басқармасының төрағасы, Бас мүфти Ержан қажы Малғажыұлы имамдар арасына «Уағыз айтылмаған ауыл, өңір қалмасын» деген ұран тастап отыр. Бас мүфти тапсырмасына орай, бүгінде АНТ аудан, ауылдарды аралап, халықты толғандырған сұрақтарға жауап беруде. ҚМДБ-ның барлық өкілдіктерінде өңірдің діни ахуалымен етене таныс имам-молдалар мен дін қызметкерлерінен тұратын жергілікті уағыз-насихат топтары құрылып иманды күшейтетін, жастарымыздың тәрбиесін шыңдап, халықты ынтымаққа шақыратын және ұлтаралық келісім мен дінаралық татулықты көздейтін тақырыптарда түрлі деңгейлердегі кездесулер өтіп, дәстүрлі Исламның құндылықтары жайлы құнды ақпараттар берілуде. Өкілдіктердің білікті имамдарынан жасақталған уағыз-насихат топтары осы күнге дейін 62 қала, 122 аудан, 33 кент, 1456 ауылға жуық елді-мекендерді аралап, 200-дей жоғарғы және орта арнаулы оқу орындары мен 1654-ке жуық мектептерде кеңейтілген кездесулер өткізіп, дін мен діл жайындағы халықтың көкейінде жүрген сұрақтарына тұшымды жауаптар берілді.

ҚМДБ-ның Уағыз-насихат және ғаламтормен жұмыс бөлімі интернет уағыз-насихат жұмысын жолға қоюды жіті қадағалауға алып, асыл дініміздің құндылықтарын қалың бұқараға жеткізуде интернет ресурстарын барынша тиімді пайдалануды жолға қойды. Атап айтқанда қазірде ҚМДБ-ға қарасты 21 сайт өз жұмыстарын жүргізіп келеді. ҚМДБ-ға қарасты сайттарға апта сайын тақырыптық мониторниг жасалып, кем-кетік тұстары талданып, аталмыш сайттарды дамытудың жаңа тұжырымдамасы жасалды. Осыған сәйкес, дін тақырыбындағы ақпараттардың сенімділігін арттыру үшін діни мағлұматтар ақпараттық, танымдық, насихаттық, талдаулық, мәселелік және шолулық бағыттарда мақала, сұхбат алу, сарапшы пікірі, веб-сайттарға шолу жасау, фоторепортаж сияқты формаларда жарияланып келеді. Сонымен қатар, ҚМДБ-ның бүгінгі күннің талабына сай жаңа үлгідегі www.muftiyat.kz ресми сайты қайта жасалды. Дизайны өзгертіліп, жаңа үлгіде қызмет етуге кірісіп кетті.