Қасиетті Рамазан айының қарсаңында «Зекет» қоры Астана өкілдігінің ұйымдастыруымен қоршаған табиғатқа қамқорлық жасалып, жас жеткіншектерді жақсылыққа баулыған ерекше акция болып өтті. Акция аясында «Балам-ай» жастар және жеткіншектерді қолдау» ҚК, «Астана қаласындағы мүгедек балалар» және «Жаснұр» құлағы естімейтіндер» ассоциациясының тәрбиеленушілері өз қолдарымен құстарға ұя жасап, сол жағалау саябағына орнатып қайтты. Жас жеткіншектерді жақсылыққа үйретіп, қоршаған ортаға қамқорлық жасауға баулыған бұл акцияға «Біз бірге күшпіз!» және «Алтын жебе» еріктілер қозғалысы да атсалысты.

Айта кетейік, аталмыш акция негізі 1-сәуір – Халықаралық Құстар күніне орай өткізілуі тиіс болатын. Алайда, ауа-райының тым қолайсыздығы игі шараны кешеуілдетіп келген болатын. Дегенмен, игіліктің ерте-кеші болмайтыны тәрізді мүмкіндігі шектеулі жас жеткіншектердің өз қолдарымен жасаған ұялары мен құстарға арналған жем жәшіктері қасиетті Рамазан айында қарсаңында орнатылып, қала экологиясына үлкен үлестерін қосты.