Мәуліт айы қарсаңында Шығыс Қазақстан облысының Қатонқарағай ауданына қарасты Аршаты ауылында жаңа мешіт ашылып, еліміздегі құлшылық ордаларының қатары тағы бір ғимаратпен толықты.

Жаңа мешіттің ашылу салтанатына ҚМДБ Төрағасының орынбасары, наиб мүфти Сансызбай Құрбанұлы, Уағыз-насихат бөлімінің меңгерушісі Батыржан Берденұлы, Өскемен аймағы бас имамы Ермек Қасболатұлы, сондай-ақ Қатонқарағай ауданының әкімі Д.Қалихан мен өңірге белгілі ақсақалдар, жамағат қатысты.

Наиб мүфти Сансызбай Құрбанұлы: «Мәуліт айында Алтай баурайында жаңа мешіт ел игілігіне беріліп отыр. Шығыс өңірі үшін бұл – үлкен қуаныш. Мешітіміз жамағатқа толы болсын. Құлшылық ордасын салған азаматтарға Алла Тағала разы болсын. Бұл – аса зор сауапты іс» дей келе, жиналған халықты Мәуліт айымен құттықтап, жаңа мешітті ашты.

Салтанатты шарада Құран оқылып, еліміздің амандығын тілеп, дұға жасалды. Сонымен қатар дін қайраткері Шыңғыс қажы арнайы қатысып, Аршаты жұртына өзінің ізгі тілегін білдірсе, танымал айтыскер ақын Балғынбек Имашев жырдан шашу шашты. Аршаты ауылы атынан  мешіт салған кәсіпкер Талғат Серменовке ат мінгізіп, жамағат алғысын білдірді.

Аршаты ауылында ашылған бұл мешітте жамағаттың құлшылық жасауына барлық мүмкіндіктер қарастырылған. Аршаты ауылы Қазақстанның ең шеткі нүктесі болуымен ерекшеленетінін атай кеткен жөн.