Жуырда Аққулы ауданында көкпар ойыны ұйымдастырылып, оған Қорт, Шарбақты және Малыбай, сондай-ақ Екібастұз ауданының Ақкөл ауылының сайыпқырандары қатысты. Жарысты «Ғабдул Уахит хазірет» мешітінің бас имамы Мақсат Сансызбайұлы бастаған дін қызметкерлері аудан әкімі Абзал Әбілхақұлының тікелей қолдауымен бірлесіп өткізді.

ҚМДБ қызметінің «Дін және дәстүр» бағыты бойынша ұлтымыздың озық дәстүрлерін ұрпақ санасында және бүгінгі өмірде жандандыру, насихаттау мақсатында Павлодар облыстық өкілдігі ұлттық ойындар ұйымдастырып, салт-дәстүріміздің ұмыт бола бастаған ерекше үлгілерін қайта жаңғыртуды қолға алуда.

Сайыстың басынан соңына дейін облыс бас имамы Жолдас Қоспақұлы, аудан әкімі Абзал Әбілхақұлы ойыншылармен бірге болып, қолдау көрсетіп, жастарды жігерлендіріп отырды.

Дода нәтижесінде Ақкөл аулының «Сейфолла» командасы 1-орынды жеңіп алса, келесі орындарды Мерғалым, Шарбақты, Малыбай ауылының командалары еншіледі. Жеңімпаздар мен жүлдегерлерге арнайы сертификат, арнайы жасалған кубок, ақшалай сыйлықтар табысталды.