Арқалық қаласындағы «Мухтасиб Әлмұхаммед» мешіті және жастар ресурстық бастамалар орталығы бірлесе отырып, Қазақстан мұсылмандарының рухани тұғырнамасын таныстыру мақсатында «Жеті рухани қазық» тақырыбында насихат-форумын өткізді.

Басқосуға шаһардағы қазыналы қарттар, ардагерлер және жас буын өкілдері қатысты. Форумның негізгі мақсаты – қоғамда рухани құндылықтарды насихаттап, өскелең ұрпаққа имани тәлім-тәрбие беру, дәстүрлі ислам құндылықтарын олардың бойына сіңіру.

Жиын модераторы, Жастар ресурстық орталығы директоры Аманкелді Ахметжанов Нұр-Сұлтан қаласында өткен форум туралы жан-жақты айтып берді. Басқосуда қала әкімінің орынбасары Түбекбай Әубәкіров «Сана түзелсе – адам түзеледі» деген тақырыпта, «Мухтасиб Әлмұхаммед» мешітінің имамы Бектұрсын Торғайбайұлы дініміздегі асыл құндылықтар хақында баяндама жасады.

Сондай-ақ, форумға келген көпшілік қалалық «Рухани жаңғыру» кеңсесі директоры Роман Аймағанбетұлының, Ардагерлер кеңесінің төрағасы Жәнібек Ғапбасұлының, Фурманов ауылындағы «Тәубе» мешітінің имамы Нұрхан Асанұлының, тарихшы-этнограф Шөптібай Байділдиннің ұлағатты да мазмұнды ой-пікірін ұйып тыңдады.