Ақтөбе облысы Мұғалжар ауданы Ембі қалалық «Нұр» мешітінің бас имамы Нұрсұлтан Тұрсынқұлов былтырдан бері Алланың үйінде сауат ашып келе жатқан бірнеше шәкіртін ҚМДБ-ға қарасты діни оқу орындарына шығарып салуда.

«Мешіт жанынан ашылған сауат ашу курсында білім алған шәкірттеріміз көп. Солардың ішінен биыл 9 оқушы ары қарай діни білімдерін жалғастыру мақсатында медресе-колледждерге аттанып жатыр. Олардың қатарында 6 ер және 3 қыз бала бар. Араларында мектепті «Алтын белгімен» бітірген үздіктер де бар» деп Нұрсұлтан имам қуанышымен бөлісті.

Алдағы уақытта аталмыш шәкірттер «Нұр-Мүбарак» Египет ислам мәдениеті университеті мен медресе-колледждерге талапкер ретінде ұсынылып, емтихан тапсырады. Мешіт атынан білім жолына шыққан шәкірттерге қаржылай көмек беріліп, мешіт ақсақалы Талап молда жастарға ақ батасын берді.