Мейірімді рақымды Алланың атымен!

Елбасы Н.А.Назарбаев Қазақстан халқы Ассамблеясының төрағасы ретінде Қазақстан халқына арнаған мақаласы әрбір Қазақстандықтың көңілінен шығып, жүрегіне қонады. Себебі бұл мақала осындай қиын уақытта да Елбасы халқының басында тұрып, бірге екендігін көрсетеді.

Бүгінде бүкіл әлем халқына коронавирус қауіпті үрей сеуіп, дерттің өзінен гөрі күннен-күнге өршелене түскен дақпырты мен дабылы дүниежүзін дүрліктіруде.

Алайда, «Сақтансан-сақтаймын» демекші, төрткүл әлемге қауіп төндірген дертке немқұрайлылық танытып, немкетті қарау өзіміз үшін емес, жанымыздағы жандардың өміріне де әсерін тигізуі әбден мүмкін. Осы орайда Елбасымыз Н.А.Назарбаевтың Қазақ еліне үндеуі уақытылы және орынды жасалды.

Қазақстан көп ұлтты мемлекет қана емес, сонымен бірге түрлі дін өкілдері өзара түсіністікте өмір сүріп жатқан іргелі ел. Сондықтан біздің елімізде діни татулықты сақтау, дінаралық келісімді нығайту – үнемі Елбасымыздың басты назарында.

Қазақ халқы әлемге өзін бейбітсүйгіш, халықтар достастығын дәріптейтін ел ретінде танытты. Елбасымыздың «Бірлесе білген ел бәрін жеңеді» мақаласында ғасырлар бойы ата бабамыздың ұстаған жолын көрсетіп, осы қиындықтан да бірліктің арқасында шығатынымызды айқындап отыр.

Елбасымыз айтқандай, жақсы салт-дәстүр ешқашан жойылмайды. Қандайда бір жағдайда барлық халықтар, бауырларымыз өздері өмір сүріп жатқан елдің заңдары мен талаптарын құрметтеуге тиіс. Мемлекет тарапынан қабылданған заң бәрімізге ортақ.

Мен имам ретінде барша мұсылман қауымын сабыр сақтауға, орынсыз үрейленбеуге және Елбасмыздың үндеуін қолдауға шақырамын.

Елбасымыз айтқандай ешбір адам қараусыз қалмайды. Әрбір адамға қолдан келгенше жәрдемін көрсетіп, ақыл-кеңесін беріп, сабырлыққа шақырып, демеу жасау біздің Құдай алдындағы һәм мемлекет алдындағы парызымыз.

Қазақстан гүлденіп, көркейе берсін, әлемдегі дамыған елдердің алдыңғы регінде жүрсін деген тілек-дұғамызды қайталап отырайық. Алла халқымыздың тілегін қабыл еткей! Әмин!

Жақия қажы Исмаилов,

«Ырыскелді қажы» мешітінің бас имамы,

ҚХА мүшесі