Таң

Күн

Бесін

Екінті

Шам

Құптан

Ислам көзқарасы бойынша тамақтану әдебі қандай?

www.muftyat.kz 08.09.2017 308 0 пікір



Адамның асқа деген тәбетінің болуы әрі дастарханда аштықты басатын рұқсат етілген тамақтың тұруы Алла Тағаланың ұлы мейірімі мен жомарттығы болып табылады. 

Әр кез дастарханға жайғасарда Алла Тағаланы, Оның мейірімін еске алып, нәсіп етілген тамақ жөнінде ойлану қажет.

Тамақ ішер алдында «Бисмилляһ» деп айту - зікір, ал осы нығметтің бәрін Кімнің беріп жатқанын есте сақтау - ойлану болып табылады. Ал тамақ соңындағы «Әлхәмдулилляһ» разышылықты білдіру болып есептеледі. 

Кімде-кім дастархан басына отырғанда зікір айтып, ойланып отыратын болса, оның жеген тамағы ағзасына пайдалы болып, ал оның амалдар кітабына «разылық білдіріп, шүкірлік етті» деп жазылады. 


Сондай-ақ, ислам ғалымдары тамақ ішу кезіндегі артық салмақтың пайда болуына кедергі келтіретін сүннетті де еске салады. Аталмыш сүннетке сәйкес, қажетті мөлшерде ғана тамақтанып, дастархан басынан біраз тоймай тұру қажет.  Ал тойса да, қомағайланып тамақты асай беретін адам семіруден қашып құтыла алмайды.

Қанағатсыздық пен ысырапшылдықты тыятын аятта былай айтылған: 
«Және жеңдер, ішіңдер де ысырап етпеңдер. Күдіксіз Алла ысырап етушілерді сүймейді» (7:31).
 
Бұл аяттан тек қажеттілік аясында ғана жеп-ішуге ерікті екендігімізді аңғарамыз. Ал, тойып тұрғанын біле тұра, мөлшерден артық жесе, бұл ысырап болып табылады. Дастархан басынан қатты тоймай тұрып кетуге тырысу қажет, өз кезегінде семіздікке әкелетін  тамақ ысырапшылдығына бой алдырмаған жөн. Осы жөнінде Ибн Сина былай айтқан:
«Асқазандарыңды қажеттіліктен артық тамаққа толтырмаңдар. Аз жеп, тамақтан соң  5-6 сағат күте тұрыңдар. Дауа — ас қорытуда, ал денсаулық - сабырда».
Алла Елшісінің (оған Алланың салауаты мен сәлемі болсын) тамақ мөлшері жөнінде айтқан сөзі денсаулық рецепті болып табылады:
«Асқазандарыңды үшке бөліңдер, бір бөлігі — тамаққа, екінші бөлігі — суға, ал үшінші бөлігі - ауаға».
Демек, дастарханға отырғанда тәбетпен отырып, ал тамақтанып болғанда біраз тоймай, асқазанда су мен ауаға орын қалдыру — сүннет. 
Бірде Самура ибн Жундабаның (оған Алла разы болсын) ұлы тоя тамақ ішіп алып жүрегі айнып кетеді. Сонда Самура оған былай деген екен:
«Егер сенің жүрегің айнып кеткен соң, сен өліп қалар болсаң, саған жаназа намаз оқу керектігіне мен күмәнданар едім. Артық тамақ жеуден өлу — тақуалықтың белгісі емес».
Омардың (оған Алла разы болсын) былай айтқаны келтірілген:
«Жаның қалағанның бәрін жей беру —  қажеттілік емес, керісінше, ысырап. Ал, Алла ысырап етушілерді сүймейді».

Пікірлер (0)

Тіркелген қолданушылар ғана пікір қалдыра алады. Сайтқа кіру


Ұқсастар

Мұрағат